धनुषा ।  रामजानकी विवाह महोत्सवका लागि जनकपुरधाममा खटिएका एक प्रहरी निरीक्षक ९० हजार रुपैयाँ घुससहित पक्राउ परेका छन् ।

जिल्ला प्रहरी कार्यालय सर्लाहीमा कार्यरत प्रहरी निरीक्षक रामकिशोर साहलाई आयोगको बर्दिबासबाट खटिएको टोलीले शुक्रबार रङ्गेहात पक्राउ गरेको हो ।

जनकपुरधामको रामानन्दमा रहेको होटल सीता प्यालेसबाट साहलाई घुससहित पक्राउ गरिएको अख्तियार दुरुपयोग अनुसन्धान आयोगको कार्यालय बर्दिवासले जनाएको छ ।

ठगी मुद्दा मिलाइदिने शर्तमा ९० हजार रुपैयाँ घुस लिइरहेको अवस्थामा अख्तियारको टोलीले साहलाई पक्राउ गरेको बताइएको छ ।

लामो समयदेखि जिल्ला प्रहरी कार्यालय धनुषामा कार्यरत प्रहरी निरीक्षक साहलाई विवाह पञ्चमीको सुरक्षाको लागि काजमा जनकपुरधाम बोलाइएको थियो ।

पक्राउ परेका साहलाई नियन्त्रणमा लिएर भ्रष्टाचार निवारण ऐन अनुसार मुद्दा चलाउने तयारी भइहेको अख्तियारले जनाएको छ ।