अर्घाखाँची, कास्की, पर्सा, कैलालीका विभिन्न स्थानमा भएका छुट्टाछुट्टै सवारी दुर्घटनामा चार जनाको मृत्यु भएको छ।अर्घाखाँची, भूमिकास्थान नगरपालिका ५ स्थित सडकमा लु१ज ४१६८ नम्बरको जिपले बुधबार साँझ सोही ठाउँ बस्ने ७९ वर्षीया विष्णुकुमारी श्रेष्ठलाई ठक्कर दिँदा घटनास्थलमै मृत्यु भएको छ। जिप र चालकलाई प्रहरीले नियन्त्रणमा लिएको छ।
कास्की, माछापुच्छ्रे गाउँपालिका ३ मर्दीखोलास्थित सडकबाट बुधबार दिउँसो ग१त ३४७३ नम्बरको ट्याक्टर करिब ५० मिटर तल खस्दा ट्याक्टरले च्यापिएर चालक पर्सा घर भई हाल माछापुच्छ्रे गाउँपालिका ३ घाचोक बस्ने ४७ वर्षीय नरेन्द्रसिंह बस्नेतको घटनास्थलमै मृत्यु भएको छ।
पर्सा, वीरगन्ज महानगरपालिका ३२ ज्योति फर्मस्थित सडकमा ना५च ७१५ नम्बरको बलेरो पिकअपले ना१प ४६८९ नम्बरको मोटरसाइकललाई बुधबार दिउँसो ठक्कर दिँदा गम्भीर घाइते भएका मोटरसाइकल चालक सोही महानगरपालिका ३० बस्ने २९ वर्षीय अफ्ताव आलम अन्सारीको उपचारको लागि नारायणी अस्पताल वीरगन्जतर्फ लैजाने क्रममा बाटोमै मृत्यु भएको छ। हाल फरार रहेका उक्त बलेरोका चालकलाई प्रहरीले खोजतलास गर्नुका साथै दुवै सवारीसाधनलाई नियन्त्रणमा लिएको छ।
कैलाली, गोदावरी नगरपालिका(२ स्थित पहाडरोडमा से१ज ७३९ नम्बरको जिपको ठक्करबाट सोही ठाउँ बस्ने पैदलयात्री ३४ वर्षीय देवराम टमाटाको मृत्यु भएको छ। बुधबार साँझ ठक्कर दिँदा गम्भीर घाइते भएका टमाटाको पद्ममा अस्पताल हुँदै थप उपचारको लागि सेती प्रादेशिक अस्पताल धनगढीमा उपचारको क्रममा मृत्यु भएको हो। जिप र चालकलाई प्रहरीले नियन्त्रणमा लिएको छ।
