शनिबार भएका विभिन्न सवारी दुर्घटनामा परी तीन जनाको मृत्यु भएको छ।महोत्तरी, बर्दिबास नगरपालिका-४ विश्वकर्मा चोकमा ज१त ३६५१ नम्बरको ट्रयाक्टरले ना३स ५२०६ नम्बरको अटो रिक्सालाई शनिबार साँझ ठक्कर दिँदा एक जनाको मृत्यु भएको छ। अटोमा सवार सोही ठाउँका ३५ वर्षीय रमेश विकको शुभ स्वस्तिक अस्पताल बर्दिबासमा उपचारको क्रममा मृत्यु भएको हो।
दुर्घटनामा गम्भीर घाइते भएका २५ वर्षीय टिकाराम पाण्डेको सोही अस्पतालमा उपचार भइरहेको छ।यसैगरी महोत्तरी, जलेश्वर नगरपालिका-२ रेडक्रस चोकमा लु१त ७६९९ नम्बरको ट्याक्टरले शनिबार साँझ ठक्कर दिँदा गम्भीर घाइते भएका सोही ठाउँका साइकलयात्री प्रमोद मुखियाको १० वर्षीय छोरा राजकुमार मुखियाको मृत्यु भएको छ। जिल्ला अस्पताल जलेश्वर हुँदै थप उपचारको लागि धरान पठाइएकोमा उपचारको क्रममा आइतबार बिहान मृत्यु भएको हो।
चितवन, भरतपुर महानगरपालिका-७ तेह्रसाल चोकमा ना५९प ३३७० नम्बरको स्कुटर आइतबार बिहान अनियन्त्रित भई दुर्घटना हुँदा गम्भीर घाइते भएका स्कुटर चालक सोही महानगरपालिका-११ बस्ने २६ वर्षीय सुवास तामाङको जिल्ला अस्पताल भरतपुरमा उपचारको क्रममा मृत्यु भएको छ। दुर्घटनामा गम्भीर घाइते भएकी स्कुटरमा सवार रत्नगर नगरपालिका-६ बछौली बस्ने २० वर्षीया पुजा सुनारको चितवन मेडिकल कलेजमा उपचार भइरहेको छ।
वीरगंज संजाल
