बारा | गढीमाई मेला सञ्चालन सम्बन्धमा महागढीमाई नगरपालिका र गढीमाई मन्दिर सञ्चालन तथा विकास समितिबीचको विवाद सहमतिमा टुङ्गिएको छ ।
प्रत्येक ५ वर्षमा लाग्ने पशुबलिको रूपमा विश्वमैं प्रख्यात बाराको बरियारपुरस्थित गढीमाई मेला यस वर्ष मङ्सिर १ गतेदेखि सञ्चालन हुन गइरहेको छ । यसपटकको मेला पनि पहिलेजस्तै विवादमा घेरिएको थियो । स्थानीय तह गठनपछि मेलाको सम्पूर्ण जिम्मेवारी महागढीमाई नगरपालिकाको हुनुपर्ने अडान थियो भने मन्दिर सञ्चालन तथा विकास समितिले मेलाको व्यवस्थापन आपूmले गर्नुपर्ने दाबी गर्दै आएको थियो ।
प्रदेशका मुख्यमन्त्री र केही मन्त्रीहरूले समितिको पक्ष लिंदै स्थानीय प्रशासनलाई समितिलाई सहयोग गर्न निर्देशन पनि दिएका थिए । प्रदेशको निर्देशनविरुद्ध महागढीमाई नपाले पत्रकार सम्मेलन गरी विरोध गरेको थियो । केही महीनासम्म चलेको यो विरोध सोमवार सात बुँदे सहमतिमा टुङ्गिएको हो । दुवै पक्षबीच सहमति भएपछि सोमवार पत्रकार सम्मेलनमा महागढीमाई नपाका मेयर उपेन्द्रप्रसाद यादव र समितिका अध्यक्ष रामचन्द्र साहले मेला सञ्चालनमा अब कुनै विवाद नरहेको घोषणा गरे ।पत्रकार सम्मेलनमा महागढीमाई नगरपालिकाले वडा १ का वडाध्यक्ष सुदामा साह कानुको अध्यक्षतामा गठन गरेको पञ्चवर्षीय गढीमाई मेला मूल व्यवस्थापन समितिमा मन्दिर सञ्चालन तथा विकास समितिबाट उपाध्यक्षमा दुईजनाको नाम समावेश गर्ने, मेलाबाट
उठेको रकम व्यवस्थापन गर्न नगरपालिका र समितिको तर्पmबाट दुई/दुई जनाको नाममा संयुक्त बैंक खाता खोली सो खातामा मेलाबाट हुने आम्दानीको रकम राख्ने, मेला सञ्चालनको लागि गठित विभिन्न उपसमितिमध्ये मनोरञ्जन उपसमिति र जग्गा व्यवस्थापन उपसमितिको गठन नगरपालिका र विकास समितिले सहमतिमा गर्नेलगायतका सात बुँदे सहमति भएको जानकारी गराइएको थियो ।
राजनीतिक दबाबसँगै प्रहरी प्रशासनको पहलमा दुवै पक्षबीच सहमति भएको थाहा हुन आएको छ ।बाराका प्रजिअले मुख्यमन्त्रीको निर्देशनको कारण दुवै पक्षबीचको विवाद साम्य गर्न मध्यस्थताको भूमिका निर्वाह गरेका थिए । समितिका अध्यक्ष साहले पञ्चवर्षीय मेला यस वर्ष अन्य वर्षको तुलनामा सभ्यरूपमा सञ्चालन भई विश्वमा सन्देश दिने बताए । उनले गढीमाई मेलामा असर नपरोस् भनेर सहमतिमा अगाडि बढेको जानकारी गराए ।
नगरप्रमुख यादवले स्थानीय तहलाई पाएको अधिकारबारेमा समितिका पदाधिकारीहरूलाई जानकारी गराएको र उनीहरूले बुझेपछि दुवै पक्षबीच सहमति भएर मेला सभ्य र भव्य तरीकाले सम्पन्न गर्न राजी भएको बताए । उनले राजनीतिक स्वार्थका कारण केहीले नगरपालिका र समितिका पदाधिकारीहरूबीच विवाद सिर्जना गर्न खोजेको आरोप लगाए ।पत्रकार सम्मेलनमा बाराका प्रजिअ, प्रउलगायत नगरपालिका र समितिका पदाधिकारी, सदस्यहरूको सहभागिता थियो ।
