विद्यालयलेखि हेल्थपोस्टसम्मको लाइन काट्ने प्राधिकरणको तयारी, २९ करोड उठ्न बाँकी
वीरगंज संजाल
१३ कार्तिक २०७६, बुधबार १६:१४
२१८५
लहान । नेपाल विद्युत् प्राधिकरण वितरण केन्द्र, लहानले लामो समयदेखि महसुल नबुझाउने ग्राहकको लाइन काट्ने तयारी गरेको छ । प्राधिकरणको लहान केन्द्रले २९ करोड रुपैयाँभन्दा बढी बक्यौता देखिएको बताएको हो ।
लामो समयदेखि ग्राहकले विद्युत् महसुल नतिर्दा प्राधिकरणले २९ करोड ३७ लाख ३७ हजार २०७ बक्यौता असुल्न बाँकी रहेको विद्युत् प्राधिकरण वितरण केन्द्र लहानका प्रमुख इन्जिनीयर धीरेन्द्रकुमार यादवले जानकारी दिए ।
गार्हस्थ्य मिटरतर्फ १९ करोड १४ लाख ५१६, व्यापारिकतर्फ ९९ लाख ७१ हजार ४३९, गैर व्यापारिक मिटरतर्फ एक करोड ५८ लाख र औद्योगिक मिटरतर्फ चार करोड २६ लाख ३८ हजार ८३५ बक्यौता रकम उठाउन बाँकी रहेको प्रमुख यादवले बताए ।
विद्युत् प्राधिकरण लहानका अनुसार रामप्रसाद उमाप्रसाद स्मारक अस्पतालबाट १५ लाख १४ हजार १९२, लाहान नगरपालिकाबाट तीन लाख २० हजार, इलाका हेल्थपोस्ट भगवानपुरबाट तीन लाख ४८ हजार, इलाका वन कार्यालय धनगढीबाट एक लाख नौ हजार ५६१, जिल्ला वन कार्यालय लहानबाट ९७ हजार ८८८, जनता मावि बाखरबाट एक लाख २१ हजार २१४, मावि अयोध्यानगरबाट एक लाख ७३ हजार ७६७, मावि बरियारपट्टीबाट एक लाख १२ हजार ८४७, मावि पिप्राबाट ८३ हजार, मावि पडरियाबाट ६४ हजार २७५ रुपैयाँ बक्यौता असुल्न बाँकी रहेको छ ।
यस्तै हेल्थपोष्ट सीतापुरबाट ७६ हजार ७३०, हेल्थपोष्ट छपरारीबाट ४५ हजार, नेपाल रेडक्रस सोसाइटी दहीपुरबाट ७८ हजार ३४६, कोल्ड चेञ्जरबाट दुई लाख २८ हजार ३३१, राष्ट्रिय वाणिज्य बैंक सुखीपुरबाट एक लाख ८ हजार ७००, इलाका हुलाक कार्यालय भगवानपुरबाट ५५ हजार, कृषि सेवा केन्द्र भगवानपुरबाट ८३ हजार ९६८, कृषि सेवा केन्द्र धनगढीबाट ७० हजार १२० बक्यौता असुली गर्न बाँकी रहेको विद्युत् प्राधिकरण लाहानले जनाएको छ ।
विद्युत् महसुल लामो समयदेखि नबुझाउने ग्राहकहरुको लागत तयार गरिसकेको र तिहारलगत्तै यस्ता ग्राहकको लाइन काट्ने योजना बनाएको प्रमुख यादवको भनाइ छ । पटक–पटक विद्युत् महसुल बुझाउन ताकेता गर्दासमेत लामो समय महसुल नबुझाई अटेर गर्ने ग्राहकको लाइन काटिने प्रमुख यादवले बताए ।
वीरगंज संजाल
