वीरगञ्ज | कात्तिक हुलाकी राजमार्ग आयोजनाअन्नतर्गत पर्ने पर्साको वीरगञ्जदेखि बहुअर्वाभाठा सडकखण्डमा कालोपत्रे प्रभावित भएको छ । हुलाकी आयोजनाले ठेकेदारलाई काम गर्ने साइट उपलब्ध नगराएकोले सडक कालोपत्रे गर्न ढिलाई भइरहेको छ । वीरगञ्जको प्रतिमाचोकदेखि सेढवासम्मको ३० किलोमीटर सडक ३० महीनामा पूरा गर्ने गरी सम्झौता भएकोमा २२ महीना बितिसक्दा पनि हुलाकीले ठेकेदारलाई साइट उपलब्ध गराउन सकेको छैन ।
हुलाकी राजगमार्गको मापदण्डअनुसार सडकको राइट अफ वे ३० मीटर हुनुपर्नेमा बहुअर्वाभाठासम्मको १० किलोमीटरको अधिकांश स्थानमा ७ मीटरभन्दा बढी नभएपछि कालोपत्रे गर्न नपाइएको ठेकेदार कम्पनी एएमआर÷पप्पु जेभीका प्रोजेक्ट मेनेजर जसुवा अब्राहमले बताए । कालोपत्रे गर्नका लागि कम्तीमा ११ मीटर चाहिने बताइएको छ ।
७ मीटरमा कालोपत्रे र दायाँबाँया २÷२ मीटर सोल्जर आवश्यक पर्ने जसुवाले बताए । तर, यो खण्डको सडक ७ मीटरभन्दा बढी छैन । सडक दायाँबायाँ निजी जमिन रहेकोले स्थानीयले सडक फराकिलो पार्न अवरोध गरेका छन् । भारत सरकारको आर्थिक सहयोगमा निर्माण भइरहेको सडकका लागि जग्गा अधिग्रहण गर्नु परेमा त्यसमा लाग्ने मुआब्जा नेपाल सरकारले व्यहोर्नुपर्ने सम्झौतामा उल्लेख छ ।
तर, सरकारले मुआब्जाका लागि बजेट नभएको भन्दै काम अड्काएर राखेको छ । हुलाकी राजमार्ग १५÷१५ मीटर फराकिलो हुनुपर्ने मापदण्ड भए पनि सरकारले सन् २०१३ जुन महीनामा सचिवस्तरबाट मुआब्जाको समस्या भएमा यथास्थितिमा काम अघि बढाउने निर्णय गरेको थियो । तर, हुलाकीका परियोजना निर्देशक अशोक तिवारीले यथास्थितिमा काम गर्नबाट ठेकेदारलाई रोकेका छन् ।
सडक फराकिलो पारेर कालोपत्रे गर्ने भन्दै काम रोक्न भनेका तिवारीले अहिलेसम्म कुनै निर्णय दिन नसक्दा काम अघि बढ्न सकेको छैन । यसैबीच हुलाकीको वीरगञ्जखण्डमा नाला बनाउने स्थानमा निजी संरचना र विद्युतका पोल नहटाइदा काम अघि बढाउन नपाएको निर्माण कम्पनीले गुनासो गरेको छ ।
वीरगञ्ज पावरहाउसदेखि तिलावेखण्डमा सडक दायाँबाँया स्थानीयको अवरोधले काम ठप्प भए पनि आयोजनाले निकासका लागि प्रभावकारी पहल गरेको छैन । सो क्षेत्रमा ४५० ओटा विद्युत्का पोलसमेत नहटाइएको बताइएको छ ।
वीरगञ्ज महानगरको परियोजनाअन्तर्गत यसअघि बनाएको सडकबीचमा राखिएको नालाको मेलुअलसमेत नउठाएकाले समस्या भएको निर्माण कम्पनीको भनाइ छ । सडक क्षेत्रका अवरोध हटाउन बारम्बार आग्रह गर्दा पनि आयोजनाले प्रभावकारी कदम नचालेको देखिएको छ ।
