एजेन्सी | एक किशोरीको हत्या गरेको अभियोगमा बंगलादेशको अदालतले १६ जनालाई मृत्युदण्डको सजाय सुनाएको छ। आफू अध्ययनरत् विद्यालयको प्रधानअध्यापकमाथि यौन उत्पिडनको आरोप लगाउँदै उजुरी दिएको केही दिनमै किशोरीको हत्या गरिएको थियो। नुस्रत जहाँ रफी नामकी १९ वर्षे किशोरीको गत अप्रिल महिनामा फेनी भन्‍ने गाउँमा हत्या भएको हो।

उक्त गाउँ राजधानी ढाकाबाट १६० किलोमिटरको दुरीमा छ। घटनामा प्रधानअध्यापकसहित नुस्रतकै दुई साथी पनि दोषी ठहरिएका छन्। उनको हत्यासँगै देशैभर न्यायको पक्षमा प्रदर्शन भएको थियो। घटनाको सुनुवाई गरी फैसला सुनाउन अदालतले धेरै समय लगाएन, अन्यथा यस्तो केसमा वर्षौं बित्नेगर्थ्यो।

फैसलासँगै ‘दोषीले कुनै हालतमा उन्मुक्ति पाउनेछैनन्’ भन्ने सन्देश गएको अभियोजक हाफिज अहमदले बताए। घटनामा शक्तिशाली मानिसहरुको संलग्नता रहेका कारण नुस्रतकै साथीहरु पनि मौन बसेको अनुसन्धानले देखाएको छ। अनुसन्धान रिपोर्टका अनुसार, प्रधानअध्यापक सिराज उद दौलासहित तीन शिक्षकहरुले जेलभित्रै नुस्रतको हत्याको तानाबाना बुनेका थिए।

ती तीनै जना बिहीबार दोषी ठहरिएका हुन्। तीबाहेक सत्तारुढ अवामी लिगका दुई स्थानीय नेता पनि दोषी पाइएका छन्। स्थानीय प्रहरीले पनि पिडकलाई साथ दिँदै नुस्रतले आत्महत्या गरेको गलत जानकारी फैलाएको अनुसन्धानले देखाएको छ। जिउँदै जलाइएको थियो नुस्रतलाई गत ६ अप्रिलका दिन प्रधानअध्यापक सिराजले नुस्रतलाई फकाइफुल्याई विद्यालयको छतमा लगेका थिए।

त्यसको एघार दिनपछि नुस्रतले घटनाबारे मुख खोल्दै सिराजले आँफूमाथि दुर्व्यवहार गरेको उजुरी दर्ता गरिन्। त्यसलगत्तै बुर्का लगाएका केही मानिसहरुले नुस्रतलाई एकान्तमा घेरी उजुरी फिर्ता लिन दबाव दिए। नमानेपछि उनलाई जिउँदै जलाउन खोजियो, आगो लगाइयो। प्रहरीका अनुसार, पिडकहरुले घटनलाई सकेसम्म आत्महत्याजस्तो देखाउने प्रपञ्च गरेका थिए। तर, नुस्रत कसैगरी त्यहाँबाट उम्कन सफल भइन्।

घटनामा उनी नराम्ररी चोटग्रस्त भएकी थिइन्। घटनालगत्तै त्यसबारे उनले दिएको बयान उनका भाइले मोबाइलमा खिचेका थिए। सिराज उद डोउला (बीच) उनीमाथि नुस्रतलाई जलाउन निर्देशन दिएको आरोप लागेको छ ‘सरले ममाथि दुर्व्यवहार गरे, मनलाग्दी छोए। म अन्तिम श्वास रहुञ्जेल यो अपराधविरुद्ध लड्नेछु,’ उनले घटनामा सामेल केही मान्छेको नाम लिँदै भिडियोमा भनेकी छन्।

आगोका कारण नुस्रतको शरीरको ८० प्रतिशत हिस्सा चोटग्रस्त बनेको थियो। घटनाको ४ दिनपछि उनको मृत्यु भयो। बंगलादेशका महिला कति सुरक्षित? एक्सन एड नामक संस्थाले यसै वर्षको सुरूमा गरेको सर्वेक्षणका अनुसार, बंगलादेशका गार्मेन्ट फ्याक्ट्रीमा काम गर्ने महिलामध्ये ८० प्रतिशत, या त आँफै यौनहिंसाको सिकार बनेका छन्, या त्यस्ता घटना नजिकैबाट देखेका छन्।

तर नुस्रतले बेहोरेको कहर बंगलादेशमै असामान्य मानिएको थियो, जहाँ कसैलाई जिउँदै जलाइएको थियो। अन्यथा त्यहाँका महिलाले समुदायभित्रैबाट आउने तिखा टिकाटिप्पणी र दुर्व्यवहार, अनलाइनमार्फत हुने दुर्व्यवहार र कतिपय बेला हिंस्रक आक्रमणसमेत भोग्दै आएका थिए। नुस्रतको घटना यसकारण पनि फरक थियो, किनकी उनी प्रहरीकहाँ गइन्, मोबाइलमा आफ्नो बयान रेकर्ड गराइन्, जुन मिडियाले प्राथमिकताका साथ प्रकाशन, प्रसारण गरे। परिणामस्वरुप, प्रधानअध्यापकको रिहाइको माग गर्दै सडकमा उत्रिएका मानिसहरू पनि हच्किए।

तीमध्ये कतिपयले नुस्रतकै परिवारलाई साथ दिने निधो गरे। घटनाबारे बंगलादेशीहरूको प्रतिकृया नुस्रत प्रकरणले त्यहाँको यौनहिंसा र महिलाहरूले खेपिरहेको कहर चित्रण गर्थ्यो। त्यसैले पनि नुस्रतका लागि न्याय माग्दै कयौं मान्छे सडकमा उत्रिए। प्रधानमन्त्री शेख हसिनाले सार्वजनिक कार्यक्रममै भनिन्, ‘अपराधीले उन्मुक्ति पाउने छैनन्, कानुनको दायराबाट उम्कने छैनन्।’ परिणामस्वरुप, पहिले घटनालाई सामसुम पार्न कोशिश गरेको प्रहरीले १६ जनाविरुद्ध अर्को मुद्दा चलायो, जसमा अभियोजनकर्ताको माग थियो, दोषीलाई मृत्युदण्ड दिइयोस्।