काठमाडौं । बम काण्डमा मुछिएका नेपाली कांग्रेसका केन्द्रीय सदस्य एवं सांसद मोहम्मद अफताब आलमलाई थप ५ दिन प्रहरी हिरासतमा राख्न अदालतले अनुमति दिएको छ । आइतबार जिल्ला अदालत रौतहटले हत्याको आरोपमा पक्राउ परेका आलममाथि अनुसन्धान गर्न पाँच दिनको म्याद थप गरेको हो ।

गत असोज २६ गते पक्राउ परेका उनलाई पहिलो पटकको ७ दिनको समय सकिएपछि अनुसन्धानका लागि पुनः पाँच दिन म्याद थप गरेको हो । प्रहरीका अनुसार ०६४ सालमा बम बनाउँदै गर्दा पड््केर घाइते भएका आठ जनालाई इँटा भट्टीमा जलाएर मारेको आरोप आलममाथि छ । मारिएकामध्ये दुईजनाका परिवारले आलमविरुद्द जाहेरी दिएका थिए ।

आलम रौतहट–२ बाट प्रत्यक्ष निर्वाचित सांसद हुन् । सोही आरोपमा यसअघि पक्राउ परेका दुईजनाको बयानको आधारमा उनलाई पक्राउ गरिएको प्रदेश दुईका डीआईजी प्रद्युम्न कार्कीले जानकारी दिएका छन् । प्रहरीले पक्राउ गरेपछि आलमको सांसदको सेवासुविधा र पारिश्रमिक संसद सचिवालयले रोक्का गरिसकेको छ । आलम जिल्ला प्रहरी कार्यालय रौतहटको हिरासतमा छन् ।