काठमाडौं । न्युज २४ टेलिभिजनको विशेष कार्यक्रम ‘सीधाकुरा जनतासँग’को आज ४४४ औं एपिसोड हो । कार्यक्रमको आजको एपिसोडलाई हेटौंडाबाट प्रत्यक्ष प्रसारण गरिएको छ । आजको एपिसोडमा पनि विशेष रिपोर्टहरु प्रस्तुत गरिएका छन् ।

१. एनआरएन वडा अध्यक्ष !
काठमाडौं । जनप्रतिनिधि नहुँदा कर्मचारीका भरमा स्थानीय तह सुम्पिदा, स्थानीयले सेवा पाएनन् भनेर स्थानीय तहको निर्वाचनबाट गाँउ–गाँउबाट वडा सदस्यदेखि अध्यक्ष, मेयरसम्म चुनिएको धेरै भएको छैन । प्रशासनदेखि विकास निर्माणका काममा आफैले चुनेको प्रतिनिधि आएपछि सहज होला भन्ने आशा गरेका पर्वत पैयाँ गाँउपालिका वडा नं.४ का स्थानीयहरु अहिले आफैले चुनेको वडा अध्यक्षको अनुहार गाँउमा कमै मात्र देख्न पाउँछन् । वडा अध्यक्ष महेन्द्र श्रेष्ठ जापानमा बस्छन् । जापानमा बस्ने मात्रै होइन, उनी गैर आवसीय नेपाली संघ एनआरएन जापानका नेता समेत हुन् ।

२. जथाभावी फालिएका मदिराका बोतलहरुको फोटो खिचेको भन्दै दुई पत्रकार प्रहरी नियन्त्रणमा !
चितवन । जिल्ला प्रहरी कार्यालय चितवनले आफ्नो हाताभित्र जथाभावी फालिएका मदिराका बोतलहरुको फोटो खिचेको भन्दै पत्रकारमाथि दुब्र्यवहार गरेको छ । विहीबार दिउँसो १ बजेको समयमा प्रहरी कार्यालय पुगेका न्युज २४ टेलिभिजनका पत्रकारद्वय केदार शर्मा र भण्डाफोर अभियानका सूर्य बरालमाथि दुव्र्यवहार गरेको हो । जिल्ला प्रहरी कार्यालय संबेदनशील भएको भन्दै छरपस्ट फालिएका मदिराको बोतलहरुको फोटो खिच्न प्रहरीको अनुमति चाहिने हुनाले बिना अनुमति तस्वीर खिचेकाले नियन्त्रणमा लिइएको चितवन प्रहरीको भनाइ छ । नियन्त्रणमा परेका दुवैजना प्रहरी कन्ट्रोलमा आधा घण्टासम्म बन्दक बनाइएको थियो ।

३. रातमाटे खानेपानीको नाममा चरम लापारवाही, पाइप आयो तर पानी आएन
धनुषा । धनुषाको गणेशमान चारनाथ नगरपालिका ४ र ५ का स्थानीयले श्रमदानसहित रकम संकलन गरेर खानेपानी आयोजन सुरु गरेपनि उपभोक्ता समितिको लापरवाहीको कारण ४ बर्षसम्म धारामा पानी आएको छैन । साथै संकलित रकमको हिसाब किताबसमेत भएको छैन । स्थानीयको श्रमदान बाहेक १२० घरधुरीबाट ४ हजारका दरले ४ लाख ८० हजार नगद तथा नगरपालिकाको ११ लाख १० हजार रकमबाट सञ्चालित रातमाटे खानेपानी आयोजनमा घर–घरमा धारा निर्माण सुरु गरिएको थियो ।

४. ३१ किलोमिटरको यात्रा गर्न पाँच सय रुपैयाँ !
रोल्पा । रोल्पामा चल्ने सवारी साधानले यात्रुबाट मनपरी भाडा उठाउँदै आएका छन् । दाङ घोराहीदेखि रोल्पा थवाङ हुँदै रुकुमसम्म पक्की सडक सञ्चालनमा आएपछि पनि सवारी साधनले कच्ची सडककै आधारमा भाडा असुलिरहेका गुनासो स्थानीयले जिल्ला प्रशासन कार्यालयमा नगरेका पनि होइनन् । तर सुनुवाई नभएको उनीहरुको गुनासो छ । घोराहीदेखि रोल्पाको होलेरीसम्मको ३१ किलोमिटर पक्की सडकमा चल्ने सवारीले प्रतिब्यक्ति पाँच सय भन्दा बढी भाडा लिने गरेका छन् ।