काठमाडौं । मालपोत कार्यालय बर्दिवासमा सुरु भएको अनलाइन सेवा दक्ष जनशक्तिको अभावले प्रभावित भएको छ । एक साताअघि कार्यालयले जग्गा रजिस्ट्रेसनको काम पारदर्शी र सुव्यवस्थित अभिलेखका लागि अनलाइन सेवा सुरु गरेको थियो । तर दक्ष जनशक्ति नहुँदा सेवा प्रवाहमा समस्या आएको हो ।

कार्यालयले अनलाइन सेवा प्रारम्भ गरेपछि दक्ष जनशक्तिको अभाव खट्किएको छ । एक उपसचिव, दुई अधिकृत, सात नायब सुब्बा, तीन खरिदार, एक सहलेखापाल, दुई कम्युटर अपरेटर र चार कार्यालय सहयोगीसहित २० जना कर्मचारीको दरबन्दी भए पनि अहिले १० जना मात्र रहेको कार्यालयका निमित्त प्रमुख कमलरञ्जन बरालले जानकारी दिए । त्यसमा पनि ३ जना मात्र स्थायी कर्मचारी हुन् । अरु करारमा नियुक्त भएका हुन् । भएका कर्मचारी कम्प्युटर चलाउन पोख्त (सिपालु) नभएपछि समस्या बढेको उनले बताए ।

‘मालपोत विभागले अनलाइन सेवा सुरु गर्न निर्देशन गरेपछि सोअनुरुप काम त थालियो,’ निमित्त प्रमुख बरालले भने, ‘कार्यालयमा दक्ष जनशक्तिको अभाव छ, सेवा लिन आउने सबैको काम सक्न सकस छ ।’ सरदर दैनिक कम्तीमा १५ वटा रजिस्ट्रेसन गर्दै आएको कार्यालयले अनलाइन सेवा सुरु गरेपछि चार÷पाँच वटा टुंग्याउन पनि हम्मेहम्मे परेको बरालको भनाइ छ ।

‘काम लिएर सेवाग्राही आउनुभएको छ, तर सबैको काम हेर्ने, गरिदिने जनशक्ति हामीसँग छैन,’ कार्यालयको समस्या दर्शाउँदै उनले भने, ‘अब टाढा–टाढाबाट काम लिएर आएका सेवाग्राही सबैको काम हुन नसकेपछि हप्कीदप्की हामीले सुन्नुपर्छ ।’ तन्दुरुस्त अभिलेख र पारदर्शी सेवा प्रवाहका लागि ‘अनलाइन’ सेवा उपयुक्त भए पनि जनशक्तिको अभाव र सेवाग्राहीको चापले दैनिक कार्यालय प्रयोजनका काम सक्न अप्ठ्यारो परेको कर्मचारी बताउँछन् ।

अनलाइन सेवा सुरु भएयता दैनिकजसो सेवाग्राही काम नसकेरै घर फर्कनुपरेको छ । एउटा रजिस्ट्रेसनमा लिने, दिने र दिनेका एकाघर सगोलका व्यक्ति साक्षी बस्न आउनुपर्दा कम्तीमा तीनजना जोडिन्छन् । यस्ता १० रजिस्ट्रेसनसम्बन्धी मान्छे जोड्दा दैनिकजसो ३० जना काम नसकिएर फर्कनुपर्ने स्थिति बनेको छ ।

दैनिक सेवा लिन आउने सेवाग्राही र एक दिन पहिले काम नसकिएका सेवाग्राही थपिँदा कामको चाप बढ्दै गएर कार्यालयप्रति गुनासो निकै बढेको छ । जनशक्तिको व्यवस्थापन नै नगरी अनलाइन सेवा सुरु गर्दा सर्वसाधारणको सास्ती बढेको कार्यालयकै कर्मचारी मोहन पोखरेलको स्वीकारोक्ति छ ।

यसअघि एक दिनमै फत्ते हुँदै आएको काममा लगातार दुई÷तीन दिन धाउनुपर्दा सेवाग्राही आजित भएका छन् । ‘तपाईंको काम आज भ्याइँदैन, भोलि आउनुहोस्,’ कर्मचारीको भनाइ उद्धृत गर्दै कार्यालय परिसरमा रहेका एक सेवाग्राहीले भने, ‘हेर्नोस हजुर २० किलोमिटर पर खयरमाराबाट आएका छौं, काम नहुँदा समय र पैसा दुवैको क्षति भयो ।’ कार्यालयले सेवाप्रवाह गरिरहेमध्ये बर्दिवास नगरपालिकाको खयरमारा, पर्साहीधाप, रजवास र भङ्गाहा नगरपालिकाका–३, ४ र ५ नं वडा ३५ किलोमिटर दूरीसम्म पर्छन् ।

साविकका बर्दिवास, गौरीवास, हाथीलेट, किसाननगर, बिजलपुरा, खयरमारा र पशुपतिनगर (हाल सबै बर्दिवास नगरपालिकामा गाभिएका) एवं भङ्गाहा गाविस (हाल भङ्गाहा नगरपालिकाका वडा नं ३, ४ र ५) मा सेवा दिने उद्देश्यले विसं २०७२ साउनमा मालपोत कार्यालय बर्दिवास स्थापनासँगै सञ्चालन गरिएको हो ।

विश्वसनीयता र चुस्त अभिलेखका लागि सुरु गरिएको ‘अनलाइन’ सेवा प्रभावकारी बनाउन तत्काल दरबन्दीअनुसारको जनशक्ति मालपोत विभागले पठाउन पर्ने यस भेगका सेवाग्राहीले माग गरेका छन् ।

जिल्ला सदरमुकाम जलेश्वरमा पहिलेदेखि नै रहेको मालपोत कार्यालयको काम पनि कम्प्युटर चलाउने दक्ष जनशक्तिको अभावले प्रभावित भएको छ । जिल्लाका दुवै (जलेश्वर र बर्दिवासस्थित) मालपोत कार्यालयमा गत भदौ ३० गते अनलाइन सेवा सुरु गरिएको हो ।