वीरगंज संजाल
रियाद । साउदी अरेबियाले आफ्नो तेल प्रतिष्ठानमा भएको आक्रमणमा इरानको हात भएको कुराको आफूसँग प्रमाण भएको जनाएको छ । साउदी अरेबियाको रक्षा मन्त्रालयले हमलामा प्रयोग गरिएका १८ वटा ड्रोन र सातवटा क्रुज मिसाइल एकै दिशाबाट आएकोले यसको स्रोत यमन हुन नसक्ने बताएको छ ।
यमनमा इरान समर्थित हुथी विद्रोही समूहले आक्रमणको जिम्मेवारी लिएको थियो । इरानले यो मामिलामा आफू सामेल भएको भन्ने आरोपको खण्डन गरिसकेको छ । उसले कुनै सैन्य कारवाही भएमा त्यसको जवाफ दिने चेतावनी समेत दिएको छ । तर साउदी अरेबियाको रक्षा मन्त्रालयले आक्रमण भएको स्थानको भग्नावशेषलाई हेर्दा यो आक्रमण इरानबाट प्रायोजित भएको प्रष्ट हुने बताएका छन् ।
ती हतियार कहाँबाट प्रहार भएको हो भन्ने बारेमा भने साउदी अरेबियाको रक्षा मन्त्रालयले केही पनि बताएको छैन । अमेरिकी विदेशमन्त्री माइक पम्पेओ बुधबार साउदी अरेबिया पुगेका छन् र उनले युवराज मोहम्मद बिन सलमानसँग कुराकानी गर्ने जनाइएको छ । (बीबीसी)
