गत वर्षभन्दा डिजेलको मूल्य ६ रुपैयाँ घट्यो तर भाडा घटेन
वीरगंज संजाल
२ आश्विन २०७६, बिहीबार ०७:५१
५६११
काठमाडौं । डिजेलको मूल्य घटे पनि सरकारले सार्वजनिक यातायातको भाडादर घटाएको छैन । अघिल्लो वर्ष दसैंको समयमा डिजेलको मूल्य प्रतिलिटर १०१ रुपैयाँ थियो । अहिले ९५ रुपैयाँ छ । डिजेलको मूल्य घटे पनि यातायात व्यवसायीले साविककै भाडादर कायम गरेर असोज पाँच गतेदेखि अग्रिम टिकट बुकिङ खोल्ने बताएका छन् ।
अघिल्ला वर्षका दसैंको मुखमा जस्तै सरकारलाई सवारीको भाडादर बढाउन दबाब सिर्जना गर्न ठिक्क परेर बसेका यातायात व्यवसायी २४ भदौबाट डिजेलको मूल्य घटेपछि रातारात यातायात व्यवस्था विभागका महानिर्देशक गोगनबहादुर हमाललाई भेटेर आफूहरु चाँडै अग्रिम टिकट बुकिङ खोल्न सहमत देखिएका हुन् ।
“अघिल्ला वर्षका दसैंमा व्यवसायीलाई दसैंको टिकट खोल्नका लागि विभागले ताकेता गर्नुपर्थ्यो । तर यसपालि उहाँहरु विभागमा सजिलै आउनु भयो,” यातायात व्यवस्था विभागका एक कर्मचारी भन्छन्, “व्यवसायीहरुले भाडा नबढाई टिकट खोल्छौं भनेर सहमति गर्नुभयो । तर डिजेलको मूल्य घटेकोबारे कसैले प्रश्न उठाएन ।”
यातायात व्यवसायी र यातायात व्यवस्था विभागबीच २६ गते भएको सहमतिअनुसार असोज पाँच गतेबाट अग्रिम टिकट बुकिङ खोल्ने निर्णय भएको छ । अघिल्लो वर्ष असोज सात गते लामो दूरीमा चल्ने सवारीको भाडादरमा १० प्रतिशत भाडा बढाएपछि मात्र यातायात व्यवसायीहरु अग्रिम टिकट खुलाउन सहमत भएका थिए ।
कम्पनीमा दर्ता भएका यातायात कम्पनीले असोज १ बाट नै टिकट खुलाए पनि सरकारले सिन्डिकेट खारेज गरेको निहुँमा यातायात संघ, समितिले टिकट खुलाउन ढिलाइ गरेका थिए । तर, यसपालि अग्रिम टिकट खुलाउन व्यवसायीले भाडादर बढाउने शर्त तेर्स्याएनन् ।
विभागको वेबसाइटमा पुरानै भाडादर
डिजेलको मूल्य घटेअनुसार विभागले पनि सवारीको भाडादर समायोजन गरेको छैन । सवारीको भाडादरबारे सर्वसाधारणलाई सहजै जानकारी दिने उद्देश्यले यातायात व्यवस्था विभागले आफ्नो वेबसाइटमा पनि एक वर्ष पुरानै भाडादर हालसम्म कायम राखेको छ ।
विभागले समयमै वैज्ञानिक भाडादर नतोक्दा उपत्यकाबाट दसैं मनाउन विभिन्न जिल्ला बाहिरिने करिब २० लाख सर्वसाधारणलाई चालक, सहचालकले भनेजति नै भाडा तिर्नुपर्ने बाध्यता रहेको छ । ०६९ सालदेखि सार्वजनिक सवारी साधनको भाडादर वैज्ञानिक समायोजन हुन सकेको छैन । हालको दसैंमा सोही भाडादरमा टिकट उपलब्ध गराउने व्यवसायीले बताएका छन् ।
“वैज्ञानिक भाडा समायोजन चाहने यातायात व्यवसायीहरुले सधैं दसैंको बेला भाडा बढाएर मात्र टिकट खोल्छौं भन्नु वैज्ञानिक होइन । यसपालि त्यस्तो छैन । पोहोरकै भाडादरमा टिकट पाइने छ,” यातायात व्यवस्था विभागका महानिर्देशक गोगनबहादुर हमालले भने ।
बीच बाटोमा भाडा उठाए कारबाहीः ट्राफिक प्रहरी
गन्तव्यसम्म पुग्न आवश्यक भाडादरमा टिकट बिक्री गरिसकेपछि बीच बाटोमा पुगेर थप भाडा उठाउने सवारी चालकलाई कारबाही गरिने प्रहरीले बताएको छ । महानगरीय ट्राफिक प्रहरी महाशाखाले हालै पत्रकार सम्पन्न गर्दै यस्तो जानकारी दिएको हो ।
“तोकेको भाडादरमा टिकट काटेपछि फेरि बीचबाटोमा पुगेर थप भाडा माग्ने सवारीलाई कारबाही गरिनेछ,” महाशाखाका एसएसपी भीमप्रसाद ढकालले भने ।
यात्रुसँग बढी भाडा असुल्ने सवारीलाई रुट इजाजत खारेजसम्मको कारबाही गरिने बताउँदै उपत्यकाबाट छुट्ने लामो दुरीका सवारी चालक वा सहचालकले यस्तो व्यवहार गरे तत्कालै प्रहरीलाई खबर गर्न महाशाखाले जानकारी गराएको छ ।
