काठमाडौं : इन्द्रजात्रामा अवलोकनका लागि आउने राष्ट्रपति विद्यादेवी भण्डारीलाई कालो झण्डा देखाउन तयारी गरिरहेका केही व्यक्तिहरुलाई प्रहरीले पक्राउ गरेको छ ।

यसरी कालो झण्डा देखाउँदै विरोध गर्ने पूर्वराजा ज्ञानेन्द्र शाहका समर्थकहरु रहेको प्रहरीको भनाइ छ ।

काठमडौं प्रहरीका अनुसार यसरी विरोध गर्ने तयारीमा रहेका पूर्वराजा शाहका समर्थकहरुलाई दुई सय कालो टिसर्टसहित पक्राउ गरी महेन्द्र पुलिस क्लवमा राखिएको छ ।

राष्ट्रपतिको आगमनको क्रममा विरोध प्रदर्शनको तयारीमा रहेका पूर्वडिआईजी विजय भट्टसहित २५ जनालाई पक्राउ गरिएको काठमाडौं प्रहरी परिसरका प्रवक्ता डीएसपी होबिन्द्र बोगटीले जानकारी दिएका छन् ।

इन्द्रजात्रामा पूर्वराजा शाहलाई बोलाउनुपर्ने मागसहित कालो झण्डाको साट्टा कालो टिसर्ट लगाएर उनीहरुले विरोध प्रदर्शनको तयारी गरेका बेला प्रहरीले उनीहरुलाई पक्राउ गरेको बताएको छ ।