वीरगंज। वीरगज महानगरपालिकाभित्र एडिबीको लगानीमा कालिका कन्स्ट्रक्शनले निर्माण गरिरहेको सडक, ढल तथा नाला निर्माणको क्रममा निस्केको माटोमा अनियमितता भइरहेको स्थानीयले आरोप लगाएका छन् ।

नाला, ढल र ह्युमपाइप जडान गर्दा निस्केको माटो ठेकेदार कम्पनीले अन्य व्यक्तिलाई बिक्री गरिरहेको प्रमाण फेला परेको छ । नर्सिङ क्याम्पसको सडकमा ह्युपपाइप जडान गर्दा निस्केको सयौ टिपर माटो ठेकेदारले निजी जमीनमा खसालेको आरोप स्थानीयले लगाएका छन् ।

ना।१ क ३६५१ नम्बरको टिपरले बाइपास सडकको पानी ट्याङ्की नजीक रहेको निजी जग्गामा माटो खसालिरहेको पाइएको छ । सार्वजनिक सम्पत्ति यसरी दुरुपयोग भइरहे तापनि कसैले चासो देखाएको छैन ।

ह्युमपाइप जडानको क्रममा निस्केको माटो महानगरको खाली जग्गामा राख्नुपर्ने नियम छ तर ठेकेदार कम्पनीले सो माटो निजी व्यक्तिलाई बेचेर गैरकानूनी काम गरिरहेको स्थानीयको भनाइ छ ।

यस विषयमा योजना प्रमुख शैलेन्द्र श्रेष्ठले यस्तो कार्य गर्नेलाई प्रहरी लगाएर पक्राउ गराउने बताए । उनले सार्वजनिक सम्पत्ति हिनामिन गर्न नपाइने बताउँदै सो ठाउँमा पुगी कारबाई गर्ने जानकारी दिए । कालिक कन्स्ट्रक्शनका प्रतिनिधि ठाकुर ढकालले यसबारे तत्काल बुझेर कारबाई गर्ने सन्देश पठाएका छन्। prateekdaily.comबाट