वीरगन्ज| सडक विभागले गण्डकदेखि मितेरी पुलसम्मको सडक फराकिलो बनाउन सूचना प्रकाशित गरेको छ। यो सडक दुबैतर्फ २५ मिटर फराकिलो बनाउने भन्दै सडकमा चर्चिएको पूर्वाधार खाली गर्न विभागले सूचना जारी गरेको हो।

त्रिभुवन राजमार्गको गण्डकदेखि घण्टाघर,माइस्थान,आदर्शनगर,मकालु चोक,विर्ता, रजतजयन्ती चोक, वीरगंज भन्सार र मितेरी पुलसम्म सडक फराकिलो हुनेछ।विभागले छठसम्ममा खाली गर्न आग्रह गरेको छ। विभागको सूचना जारी भएपछि व्यापारीहरु अन्यत्र कोठा खोज्न थालेका छन्।वीरगंज टेजारथ टोलमा व्यवसाय गरिरहेकी सुमित्रा लम्सालले विभिन्न स्थानमा कोठा खोज्न चहार्दा समेत नपाएको बताईन्।कोठा खोज्ने बढेपछि भाडा समेत बढेको छ।

घण्टाघरदेखि विर्ता सम्म मुख्य सडकमा एउटा सटरको लागि मासिक ३० हजारमा पाउन समस्या भएको वीरगंज प्रगति मार्केटमा पसल सञ्चालन गरेकी ९९ सपकी सञ्चालिका संगीता पटेलले बताईन्।उनले सडक विस्तारको सूचनासँगै भाडा २५ प्रतिशतले बढाएको बताउँदै पसलका लागि अग्रिम रकम समेत माग्न थालेको बताईन्।सडक विस्तारमा व्यवसायिक पसल मात्रै होइन बैंकहरु पनि स्थानान्तरण गर्नुपर्ने अवस्था आएको छ। मूख्य सडकमै रहेको सिद्धार्थ बैंक प्रभावित हुने देखिएको छ।

केही वर्ष अघि राजीब पराजुलीसँग जग्गा खरीद गरेर तीन तल्ले भवनमा सेवा दिएको सिद्धार्थको केही भाग पर्ने देखिएको छ।हिमालयन बैंक र सिटिजन्स बैंकले भर्खरै खरीद गरेर राणीसति मन्दिर नजिकको नयाँ भवनको काउन्टर समेत भत्काउनुपर्ने देखिएको छ।महाविर स्थानमा रहेको सिभिल बैंक ,आदर्शनगर चोकको सनराइज बैंक,माइस्थान तथा विर्ताको नेपाल बैंकको शाखा समेत पर्ने देखिएको छ।