वीरगंज । जिल्ला प्रहरी कार्यालय पर्साले प्रतिबन्धित लागु औषध गाँजासहित ३ जनालाई नियन्त्रणमा लिएको छ । वीरगञ्ज महानगरपालिका वडा नम्बर ३१ मिलन चोकस्थित सडक खण्डबाट ३ जनालाई प्रहरी चौकी मिलनचौकबाट खटिएको प्रहरीले पक्राउ गरेको हो ।

जितपुरबाट विरुवागुठीतर्फ जाँदै गरेको प्रदेश २ ०३ ००१ ह् ९७६ नम्बरको सार्वजनिक ट्याम्पो रोकी चेकजाँच गर्दा अवैध लागु औषध गाँजा फेला परेको जिल्ला प्रहरी कार्यालय पर्साका प्रवक्ता एवम् प्रहरी नायब उपरीक्षक दिपक गिरीले जानकारी दिए । उनका अनुसार मकवानपुरको राक्सिराङ् गाउँपालिका वडा नम्बर १ निवासी ३५ वर्षीय सिमोन चेपाङ्ले बोकेको जेब्रा झोलाबाट ५ किलोग्राम ९ सय ग्राम गाँजा फेला परेको हो ।

सिमोनसँगै रहेकी सिमोनकी बहिनी भनिएकी मकवानपुरकै कैलाश गाउँपालिका वडा नम्बर ८ र हाल चितवनको राप्ती नगरपालिका वडा नम्बर १ बस्ने ३० वर्षीय ईन्द्र माया चेपाङ् र सिमोनकी श्रीमती कैलाश गाउँपालिका वडा नम्बर ८ कि ३१ वर्षीय सितामाया प्रजालाई पक्राउ गरिएको गिरीले जानकारी दिए । उनीहरुलाई पर्सा जिल्ला अदालतबाट जरुरी पक्राउ पुर्जी समर्थन गराई आवश्यक अनुसन्धान भइरहेको छ ।