वीरगन्ज, साउन ३ –अनेरास्ववियु ठाकुरराम बहुमुखी क्याम्पस कमिटी वीरगन्जद्वारा क्याम्पस परिसरमा वृक्षारोपण कार्यक्रम सम्पन्न गरिएको छ। हरित वातावरण प्रवर्द्धन गर्ने उद्देश्यसहित सञ्चालन गरिएको कार्यक्रममा विभिन्न फलफूलका विरुवा, फूलका बोट तथा बहुवर्षीय बोटबिरुवाहरू रोपिएका छन्।
कार्यक्रमको अध्यक्षता अनेरास्ववियु क्याम्पस कमिटी अध्यक्ष अरमान आलमले गरेका थिए।
कार्यक्रमका प्रमुख अतिथि अनेरास्ववियु केन्द्रीय समिति सदस्य आशिफ अहमद, विशिष्ट अतिथि विद्यार्थी विभाग प्रमुख रियाज अन्सारी, अतिथि जिल्ला अध्यक्ष सुजित मण्डल, सचिव पुकार सुवेदी ‘विवेक’ लगायत प्रगतिशील जनवादी विद्यार्थी संगठनका सदस्यहरूको सहभागिता रहेको थियो।
कार्यक्रमअन्तर्गत रोपिएका विरुवा र पुष्प प्रजातिहरूमा आँप, अनार, नारियल, अम्बा, निम्बु, ताड, बरगद, कमल, छुईमुई, केसर, कचनार, कन्द पुष्प लगायतका फलफूलका विरुवा तथा गुलाब, गुलमोहर, चम्पा, सुर्यमुखी, सदाबहार, बनफूल, महिमा फूल, गेँदा जस्ता पुष्पीय प्रजातिहरू रहेका छन्।
कार्यक्रममा बोल्ने वक्ताहरूले विद्यार्थीहरूले वातावरण संरक्षणमा नेतृत्व लिनु समयको माग भएको उल्लेख गर्दै यस्ता कार्यक्रमलाई निरन्तरता दिनुपर्ने आवश्यकता औंल्याएका थिए।
