वीरगञ्ज । विशेष सूचनाको आधारमा जिल्ला प्रहरी कार्यालय बाराले अवैध रूपमा भन्सार छली गरी ल्याइएका करिब ६६ लाख ४७ हजार ९५० रुपैयाँ मूल्य बराबरका विभिन्न सामानसहित एक ट्रकलाई नियन्त्रणमा लिएको छ ।

बारा प्रहरीका अनुसार, बिहीबार बिहान करिब पौने ७ बजे जीतपुर सिमरा उपमहानगरपालिका – १ पथलैया चोकमा प्रहरी चौकी पथलैयाबाट प्रहरी वरिष्ठ नायव निरीक्षक (वरिष्ठ सई) रोशन अधिकारीको कमान्डमा खटिएको टोलीले गौरबाट काठमाडौँ जाँदै गरेको ना ८ ख ४५६३ नम्बरको ट्रकलाई रोकी चेकजाँच गर्दा बिल भरपाईभन्दा बढी र स्रोत खुलाउन नसकिएका करिब ६५ लाख २९ हजार ९५० रुपैयाँ मूल्यका कस्मेटिक, जुत्ता, कपडा, औषधि, हार्डवेयर लगायतका अन्य खुद्रा सामानहरू फेला पारेको थियो ।

ट्रकलाई नियन्त्रणमा लिई आवश्यक अनुसन्धान अघि बढाइएको छ ।

त्यसै गरी, सोही दिन दिउँसो करिब डेढ बजे कलैया उपमहानगरपालिका – १० शनिचरा मठस्थित प्रहरी चौकी मटिअर्वाबाट प्रहरी हवलदार प्रितम पटेलको कमान्डमा खटिएको गस्ती टोलीले भारतबाट नेपालतर्फ टाउकोमा बोकी ल्याउँदै गरेको करिब १ लाख १८ हजार रुपैयाँ मूल्य बराबरका कपडाहरू लुकाई छिपाई ल्याउँदै गरेको अवस्थामा फेला पारेको थियो ।

गस्ती टोलीलाई देखेर सामान फालेर फरार भएकाले उक्त सामानहरू नियन्त्रणमा लिई अनुसन्धान प्रक्रिया अघि बढाइएको छ ।

जिल्ला प्रहरी कार्यालय बाराका प्रवक्ता तथा सूचना अधिकारी प्रहरी नायब उपरीक्षक (डिएसपी) प्रकाश सापकोटाका अनुसार, अवैध सामानहरूको ओसारपसार र भन्सार छलीको गतिविधि नियन्त्रण गर्न प्रहरीले सक्रिय रूपमा काम गरिरहेको छ ।

डिएसपी सापकोटाले स्थानीय बासिन्दालाई यस्ता अवैध क्रियाकलापबारे जानकारी भएमा तुरुन्तै प्रहरीलाई सूचित गर्न आग्रह गरेका छन् ।