जनकपुरधाम |  जनकपुरधामस्थित प्रादेशिक अस्पतालमा स्वाबको नमूना संकलन गराउन पुगेका एक युवकलाई स्वाब संकलन नगरि उल्टै त्यहाँबाट हप्काएर भगाइएको आरोप लगाईएको छ ।

महोत्तरीको बलबा नगरपालिका वडा नम्बर ६ गोईरगम्माका २२ बर्षिय रञ्जित झालाई पटनाबाट आफु कार्यरत कम्पनीले सरकारी प्रक्रिया पुर्याएर दुई दिनअघि घर पठाएको थियो ।

उनी घर आएपछि घरका सदस्यहरुले उनलाई शंका मेटाउन जनकपुरस्थित प्रादेशिक अस्पतालमा गएर स्वाबको नमूना जाँच गराउन भनेपछि उनी आज (शुक्रबार) दिउँसो आफ्नो स्वाबको नमूना परिक्षण गराउन प्रादेशिक अस्पताल पुगेका थिए । तर त्यहाँ नमूना त के संकलन गर्नु झन आफुलाई बेइज्जत गरेर भगाइ दिएको उनले आरोप लगाए ।

उनले भने,‘ म दुई दिनअघि पटनाबाट फर्केर आएँ, घरमा पुगेपछि मलाई सबै जनाले स्वाब टेष्ट गराउन आग्रह गरे त्यसैले आज स्वाब टेष्ट अस्पतालमा हुन्छ भनेर बिहानै यहाँ आएको थिएँ तर यहाँ आएर सोध्दा त झन अस्पताल भित्र ड्युटीमा रहेका सुरक्षाकर्मी निरज साहले जुन जिल्लामा तिम्रो घर छ त्यहि जिल्लामा गएर जाँच गराउ भन्दै हप्काएर पठाई दिए । पछि म अस्पतालका मेसु समक्ष पुगेर आफ्नो स्वाबको नमूना परिक्षण गरी दिन आग्रह गरें । उनले पनि घण्टौ प्रतिक्षा गराएर अन्तोगत्वा आफुलाई त्यहाँबाट निराश बनाएर पठाईदिए ।’

उनले आफुलाई जाँच नगरे पनि क्वारेन्टाईनमा राखिदिन आग्रह गरेपछि पनि मेसुले कुनै सुनवाई नगरेको गुनासो सुनाए । क्वारेन्टाइनमा ठाउँ खाली नरहेको जवाफ दिंदै आफुलाई त्यहाँबाट हप्काएर पठाइएको रञ्जितले गुनासो पोखे ।

यता यस सम्बन्धमा प्रादेशिक अस्पताल जनकपुरका मेडिकल सुपरिटेन्डेन्ट डा.नागेन्द्र यादवले सो युवकलाई अस्पतालको कर्मचारीले दुव्र्यवहार नभई सम्झाएर तपाईं आफ्नै जिल्लाको कुनै क्वारेन्टाइनमा गएर त्यहिं स्वाबको नमूना संकलन गराउनुस भनेर सुझाव दिएको बताए ।